БИШКЕК, 12-мар. — Sputnik. Кыргызстанга Россия берген 40 өрт өчүрүүчү автоунаанын ичинен Нарын облусуна бөлүнгөн жети техника кечээ райондорго тапшырылды. Мындан сырткары, Өзгөчө кырдаалдар министрлигинин Нарын облусундагы башкармалыгына куткаруу иштеринде пайдаланыла турган эки жана кызматтык бир автоунаа берилди. Бул тууралуу аймактык кабарчы билдирди.
Техникалар президенттин Нарын облусундагы ыйгарым укуктуу өкүлү Алтынбек Эргешов тарабынан Өзгөчө кырдаалдар министрлигинин Нарын облусундагы башкармалыгына тапшырылып, райондорго бөлүштүрүлгөн.
Өзгөчө кырдаалдар министрлигинин Нарын облусундагы башкармалыгынын башчысы Талант Касиев "облуста өрт өчүрүүчү, куткаруучу автоунаалар жетиштүү болуп калды" деп белгилеген. Бирок өзгөчө кырдаалдарды алдын алуу үчүн инженердик-техникалык каражаттарга болгон муктаждык бар экендигин айткан.