БИШКЕК, 11-мар. — Sputnik. Коопсуздук кеңешинин катчысы Марат Иманкулов Жамааттык коопсуздук келишим уюмунун башкы катчысы Имангали Тасмагамбетов менен жолукту. Бул тууралуу президенттин маалымат кызматы кабарлады.
Жыйындын жүрүшүндө ЖККУнун учурдагы практикалык ишмердүүлүгүнүн маселелери каралган. Анын ичинде уюмдун Коопсуздук кеңештин катчыларынын комитетинде мурда кабыл алынган чечимдердин жана 2023-жылга пландалган иш-чаралардын аткарылышы талкууланган.
Аймактык коопсуздук маселелери, ошондой эле учурдагы жаңы чакырыктарга жана коркунучтарга натыйжалуу жооп кайтаруу боюнча пикир алмашуу болгон.
Иманкулов Кыргызстандын ыйгарым укуктуу органдары мурдагыдай эле ЖККУнун дараметин жана кадыр-баркын бекемдөөгө, конструктивдүү жана активдүү салым кошууга даяр экенин билдирген.
Ошондой эле уюмдун жаңы дайындалган башкы катчысы Имангали Тасмагамбетовго ийгиликтерди жана жаңы жетишкендиктерди каалаган.