БИШКЕК, 11-мар. — Sputnik. Кыргызстанда 10-15 күндөн кийин жыл бою иштей турган тоо лыжа курортунун курулушуна старт берилет. Бул тууралуу министрлер кабинетинин төрагасы Акылбек Жапаров “Мир” телеканалына курган маегинде билдирди.
Ага туризмди өнүктүрүү багытындагы пландар тууралуу суроо узатылды.
“Бишкекке жакын жерге курулат. Анда 20 чакырымдай фуникулер болуп, кышы-жайы иштейт. Техникалык имараттардын бардыгы австриялык Doppel Maier фирмасы тарабынан курулат. Бул компания алдыңкы үчтүктө турат. Алардын мастерлери Кыргызстанга келип кетишкен. Биз чет элдик адистерди жалдап, жер бөлүп бердик. 10-15 күндөн кийин курулуш иштери башталат”, — деди Жапаров.
Ал Кыргызстандын туризм жаатында атаандаштык артыкчылыктары көп экенин белгиледи.
“Бизде Ысык-Көл бар, андан башка канчалаган дарыялар менен көлдөр турат... Тоолордун башында эле 6,5 миң мөңгү бар. Биз жайында төрт мезгилди көрсөтө алабыз. Тик учак менен Ленин, Жеңиш чокусуна, андан бийиктерине да барса болот. Бир аз ылдый түшүп жаз менен күздү көрүүгө болот. Ажайып Ысык-Көлдүн пляждары бар. Биз туризм жаатындагы артыкчылыктарыбызды так билебиз”, — деген өкмөт башчы.
Белгилей кетсек, бул курорттун курулушу тууралуу өткөн жылдын декабрь айында айтылган.