БИШКЕК, 10-мар. — Sputnik. АКШнын бийлиги расмий эмес түрдө Батыштын чектеген баа саясатынын алкагында сырье менен иштеген дүйнөлүк трейдерлерди Россиядан мунайды чочулабай алып, келишим түзө берүүгө чакырды. Бул туурасында РИА Новости Financial Times басылмасына таянып жазды.
Газета АКШнын Финансы министрлигинин кызматкерлери Trafigura жана Gunvor трейдерлик компанияларынын өкүлдөрү менен жолукканын кабарлады. Штаттар Россия мунайынын чектелген баада сатылышына тыюу салбаганы менен ишканалар буга батынып бара албагандыгын белгилеген.
Жолугушууга катышкандардын бири АКШ Россия нефтисин сатууну жандандырууга "жигердүү чакырык жасашканын" басылмага айтып берген.
Газета Вашингтондун Москванын сырьену сатуудан түшкөн кирешесин азайтууга аракеттенип, бирок аны менен катар эле Россия мунайынын келип турушун сактап калууга аракет жасап жатканын билдирген. Себеби алар ири экспортчунун продукцияны бербей калгандан кийинки кесепетинен коркушарын жазган. Ак үйдүн өкүлү бул ЖМКга Россиянын кирешесинин төмөндөп кеткенине карабай мунай рыногунун туруктуу болуп жатышы аларга үмүт жаратып жатканын айткан.
Евробиримдиктин нефтиге жана мунай заттарына эмбарго киргизүү чечими өткөн жылдын жай айларында кабыл алынган. Алты айга салынган нефть санкциялары 5-декабрда күчүнө кирип, ал эми жылытуучу ресурстарга чектөө эки ай кечирээк, 5-февралда киргизилген.
Россия Батыш өлкөлөрүнүн аракеттерине жооп иретинде өзүнүн контрсанкцияларын даярдаган. Былтыркы жылдын соңунда РФ лидери Владимир Путин контрагенттер менен болгон келишимде бааны чектөө тууралуу түз же кыйыр түрдө жазылса, аларга россиялык мунайды жана мунай заттарын бербөө туурасында атайын жарлык чыгарган.
Нефть боюнча чектөө 1-февралдан тарта башталса, мунай азыктары боюнча датаны өкмөт аныктай турганы айтылган. Жарлык жалпы күчүн 1-июлга чейин жоготпой турганы жазылган.