Кыргызстан ЕАЭБ сотуна кыргыз-казак чек арасындагы маселелер боюнча үч жолу кайрылып, утуп чыккан. Бул тууралуу Айжамал Ажибраимова Sputnik Кыргызстан радиосуна маек куруп жатып билдирди.
Анын айтымында, ЕАЭБде аткаруучу орган катары ЕЭК эсептелсе, укуктук маселелер үчүн ЕАЭБ соту иш алып барат.
"ЕАЭБде биримдикке мүчө-өлкөлөрдүн келишими жана Бажы кодекси нормативдик документ катары иштейт. Буларды чечмелөө, уюмдун ичиндеги талаштуу маселелерди чечүү мүмкүндүгү ЕАЭБ сотуна жүктөлгөн. Ал үчүн уюмга мүчө-мамлекеттердин мамлекеттик органдары талапка ылайык кайрылат. Жети жыл аралыгында ЕАЭБ соту 200дөй соттук акт чыгарды. Бул эл аралык сот үчүн көп. Салыштыруу үчүн айтсак, Евробиримдиктин соту түзүлгөндөн кийинки жети жылда бир дагы иш караган эмес. Ушул жети жылда эң көп кайрылуу боюнча тизмектегенде Россия биринчи орунда турат. Андан кийин Казакстан, Беларусь болсо, Кыргызстан төртүнчү орунда. Ал эми Армения бир дагы жолу кайрылган эмес. Бул калкынын санына, экономикалык мүмкүнчүлүгүнө караганда мыйзам ченемдүү эле көрүнүш. Аталган сотко кайрылуу укугу Юстиция, Тышкы иштер, Экономика жана коммерция, Финансы, Айыл чарба министрликтерине берилген. Кыргызстан Юстиция министрлигине караштуу сот өкүлчүлүгү борбору аркылуу дагы кайрыла алат. Мындай уникалдуулук башка өлкөлөргө берилген эмес. Ишкерлер мына ушул органдар аркылуу ЕАЭБ сотуна кайрылса болот. Мисалы, Кыргызстан кыргыз-казак чек арасындагы талаштуу маселе боюнча үч жолу кайрылып, соттон утуп алган. Ошондуктан өкмөткө эле доомат кое бербестен ишкерлер өз алдынча аракеттерди көрүшү керек", — деди Ажибраимова.
Ошондой эле ал ишкерлер ЕЭКке кайрылып, анын жыйынтыгына канааттанбаса комиссиянын аракети жана аракетсиздиги боюнча дагы ЕАЭБ сотуна кайрылса болорун кошумчалады.