БИШКЕК, 6-мар. — Sputnik. Биринчи айым Айгүл Жапарова РФтин Федералдык жыйынынын федерация кеңешинин төрайымы Валентина Матвиенко менен жолугуп, бир катар маселелерди талкуулаган соң аны Кыргызстанга келип кетүүгө чакырды.
Президенттин маалымат кызматы билдиргендей, биринчи айым Федерация кеңешинин спикери менен "Кыргызстан менен Россиянын аялдарынын келечек үчүн диалогу" аттуу кыргыз-россиялык Аялдардын I форумуна катышуусунун алкагында жолуккан.
Тараптар маданий-гуманитардык жактан өнүктүрүү маселелери, ошондой эле аялдарга тиешелүү актуалдуу темалар боюнча пикир алмашкан.
Матвиенко Айгүл Жапаровага бул Аялдардын форумуна катышуу чакыруусун кабыл алганы үчүн ыраазычылык билдирген.
Жапарова Россия тарапка чакыруусу үчүн ыраазычылык билдирип, аталган форумдун алкагында жетишилген макулдашуулар Кыргыз — Россия достугун мындан ары да чыңдап, боордош эки элдин жыргалчылыгы үчүн көп кырдуу эки тараптуу кызматташтыкты өнүктүрүүгө салым кошорун белгилеген.
"Ал маданий-гуманитардык мүнөздөгү маселелерге токтолуп, ал быйыл Кыргызстан КМШга төрагалык кылып жатканын, быйыл улуттар аралык баарлашуу тили катары орус тили жылы деп жарыяланганын белгиледи. Кыргызстан үчүн орус тили биринчи кезекте орус маданиятынын, анын илимий-техникалык жетишкендиктеринин казынасынын ачкычы, ошондой эле Кыргызстандын жарандарынын Россияда эмгек укуктарын ишке ашыруу жана россиялыктарды кыргыз маданияты жана тарыхы менен тааныштыруу мүмкүнчүлүгү катары саналат", — деп белгиленген маалыматта.
Ошондой эле быйыл улуу планетардык масштабдагы жазуучу Чыңгыз Айтматовдун 95 жылдык мааракеси кеңири белгиленет.
"Ушуга байланыштуу кыргыз тарап КМШ алкагында өтө турган көрүнүктүү жазуучу Чыңгыз Айтматовдун 95 жылдыгына арналган тематикалык иш-чараларга активдүү катышууга жана анын эмгектерин 2023-жыл КМШда эл аралык баарлашуунун тили катары орус тили жылы деп жарыялоонун алкагында орус тилин изилдөө аркылуу аны жайылтууга даяр", — деп билдирди маалымат кызматы.
Жапарова Матвиенкону ага ыңгайлуу болгон каалаган учурда Кыргызстанга келүүгө чакырган.