БИШКЕК, 5-мар. — Sputnik. Садыр Жапаров бүгүн, 5-мартта, Ак-Ордо конушуна пландан тышкары барып, жакында эле соттун чечими менен үйү түрттүрүлүп жана балдары менен барар жери жок калган Марал Шараболотова менен жолукту. Бул тууралуу президенттин маалымат катчысы Эрбол Султанбаев билдирди.
Анын айтымында, бул кабар коомчулукта чоң резонанс жараткандыктан мамлекет башчысы маселени жеринде териштирүүнү чечкен. Жапаров окуянын чоо-жайын сураштырып, жергиликтүү тургундар менен баарлашты.
“Абийирсиз тараптардын ишмердүүлүгүнүн натыйжасында бул сыяктуу көйгөй көпчүлүк жарандарда болууда. Президент Жапаров териштирүү жүргүзүү жана бардык күнөөлүүлөрдү жоопкерчиликке тартуу тапшырмасын берди”, - деди Султанбаев.
Белгилей кетсек, аялдын үй-бүлөсү жер тилкесин 10 жылдай мурун ишеним кат менен сатып алып, салган үйдө жолдошу жана жашы жете элек төрт баласы менен жашап келген. 2017-жылы мораторий маалында ушул эле тилкеге башка тараптар кызыл китеп алышкан. Соттук органдар аялдын курулушун мыйзамсыз деп таап, аны бузуу чечимин чыгарышкан.