БИШКЕК, 4-мар. — Sputnik. Россия, Казакстан жана Өзбекстан Кыргызстандын товарларын эң көп сатып алган мамлекеттер. Бул тууралуу Улуттук статистикалык комитеттин маалыматында айтылат.
Өткөн жылы Кыргызстандын жалпы тышкы соода жүгүртүүсү11,8 миллиард долларды түзүп, анын ичинен 2 миллиард 186,7 миллион доллар экспортко туура келген (2021-жылга салыштырмалуу 565,5 миллион долларга аз). Республика өзүнүн товарларын 90дон ашык өлкөгө экспорттойт.
Кыргызстандан ири көлөмдөгү товарларды сатып алган мамлекеттер (экспорт 10 миллион доллардан ашат):
Россия — 963,6 миллион доллар (жалпы экспорттун 44,1 пайызы);
Казакстан — 438,2 миллион (20%);
Өзбекстан — 236,6 миллион (10,4%);
Түркия — 140,7 миллион;
БАЭ — 101 миллион;
Кытай — 60,8 миллион;
Беларусь — 35,7 миллион;
Афганстан — 21,6 миллион;
Гонконг — 16,3 миллион;
Германия — 15,8 миллион;
Бельгия — 14,8 миллион;
Иран — 13,5 миллион;
Индия — 10,5 миллион.
2021-жылга салыштырмалуу экспорттун азайгандыгына карабастан, жогоруда аталган өлкөлөргө товар жеткирүү көбөйгөн (Кытай жана анын атайын району Гонконгду эске албаганда). Пайыздык эсеп менен алганда Иранга (14 эсеге), Россияга (2,45), Афганстанга (2,25) жана Индияга (2) экспорт өскөн.