БИШКЕК, 4-мар. — Sputnik. Тышкы иштер министри Жээнбек Кулубаев Nestle компаниясын Кыргызстанда долбоорлорун ишке ашыруу мүмкүнчүлүгүн карап чыгууну сунуштады. Бул тууралуу ТИМдин маалымат кызматы кабарлады.
Мындай сунуш Кулубаев менен компаниянын улук вице-президенти Питер Свенссондун Швейцариядагы жолугушуусунда айтылган.
© Фото / пресс-служба МИД КР
Кулубаев Кыргызстандын чет элдик инвесторлор үчүн жагымдуу шарттарды түзүү аракети жана өлкөнүн экспорттук потенциалы тууралуу кенен маалымат берген.
"Кыргызстандын суу ресурстарын, ошондой дүйнөдө бөтөлкөдөгү таза сууга болгон суроо-талаптын өсүп жатканын эске алуу менен бул багытта кызматташуу мүмкүнчүлүгүн карап чыгуу сунушталды", — деп айтылган маалыматта.
Натыйжада Свенссон жетектеген компаниянын миссиясы Кыргызстанга өлкөнүн экспорттук мүмкүнчүлүктөрү жана өндүрүштүк потенциалы менен таанышуу үчүн келмей болгон.
Nestle — дүйнөдөгү эң ири тамак-аш өндүргөн швейцариялык компания. Ишкана кофе, минералдык суу, шоколад, балмуздак, сүт азыктары, балдар тамагын чыгарат. Негизги бренддери — KitKat, Maggi, Nescafe, Nesquik, Nestea.