БИШКЕК, 3-мар. — Sputnik. Ош шаарында ири суммадагы акча каражатын уурдаган деп өспүрүмдөр кармалды. Бул тууралуу Ош шаардык ички иштер башкармалыгынан билдирди.
Маалыматка ылайык, милиция кызматкерлери тарабынан Ош шаарынын тургундары, 15 жаштагы Д.М. жана Н.А. кармалышкан.
"Кылмыштын негизги уюштуруучусу Д.М. буга чейин үч жолу кылмыш жоопкерчилигине тартылган. Шектүүлөр ушул жылдын 22-январында шаардагы Масалиев көчөсүндө жайгашкан кафелердин бирине терезеси аркылуу кирип, жалпы суммасы 5 миллион сомдон ашык акчаны уурдап кетишкен. Учурда шектүүлөр Жалал-Абад шаарындагы атайын балдардын тергөө абагында кармалууда", — деп айтылат маалыматта.
Милициядан кошумчалагандай, өспүрүмдөр уурдалган акчанын көпчүлүк бөлүгүн каткан жеринен алып беришкен, бирок 480 миӊ сомду коротуп салышкан.
Аларга карата КР Кылмыш-жаза кодексинин 205-беренесинин негизинде кылмыш иши козголуп, тергөө иштери уланууда.