БИШКЕК, 1-мар. — Sputnik. Баткен облусуна быйыл эки чоң билим берүү комплекси курулат. Бул туурасында билим берүү жана илим министринин милдетин аткаруучу Каныбек Иманалиев парламентте билдирди.
Анын айтымында, бирин Россия-кыргыз өнүктүрүү фонду, экинчиси Россия өкмөтү тарабынан каржыланат.
"Экөө тең эл аралык деңгээлдеги мектеп болот. Эки бассейни менен. Бюджети 3 миллион доллардын тегерегинде. Бирөө быйыл, экинчиси кийинки жылы башталышы мүмкүн", — деди Иманалиев.
Ал эми министрдин орун басары Надира Жусупбекова Россия менен тогуз мектеп куруп берүү макулдашылганын, алар облустарда жана Бишкек, Ош шаарларына салынарын кошумчалады. Учурда жерлер бөлүнүп даярдалган.