"Өзүмдүн мисалымды айтайын, үч балам бар, бирөө үч тилде, бирөө төрт тилде, бирөө беш тилде эркин сүйлөйт. Муну мен бардык жерде сыймыктанып айтып жүрөм. Айрым кишилер "Мусаев орус тилине каршы" деп ойлойт. Биздин тагдыр Россия менен байланышкан, ошондой тарыхый өбөлгө түзүлүп калган. Анда талаш жок. Кыргыздар "жыргаганымдан жылкычы болдумбу" деп айтат. Биз ушундай конституциялык мыйзам жазганга аргасыздан бардык. 1989 жана 2004-жылы мыйзам кабыл алынды, ошол экөө тең иштебей койду. Мен Тил комиссиясынын төрагасы болуп турганда Бишкектин мэрин, төрт райондун акимин чакырып "көчөнү карагылачы, ит тытып кеткен койдун терисиндей" деп айттым. Анан алар "агай, биз сиздин мыйзам боюнча иштебейбиз, анткени өзүбүздүн "Жарнак жөнүндө" мыйзамыбыз бар" деди. Ошондон кийин чыккан ой. Тил мыйзамын конституциялык кылыш керек дегенге ишендик. Антпесек эч ким сыйлабайт экен, "өзүмдүн мыйзамым бар" деп чыгат", — деди Мусаев.