БИШКЕК, 22-фев. — Sputnik. Билим берүү жана илим министри Уланбек Мамбетакунов кызматтан кетип, ордуна экс-депутат Каныбек Иманалиев келиши мүмкүн. Бул туурасында өздүк маалымат булактар билдирди.
Кадр алмашуунун себеби азырынча белгисиз. Sputnik Кыргызстандын кабарчысы Иманалиев менен байланышканда "азырынча так эмес" деп маалыматты четке каккан да, төгүндөгөн да жок.
Мамбетакунов министрлик кызматка былтыр 7-ноябрда дайындалган, ага чейин орун басар болуп иштеп жаткан.
Ал эми Иманалиев Жогорку Кеңештин V жана VI чакырылыштарынын депутаты болгон. 2021-жылы президенттик шайлоого талапкерлигин койгон.