Адал индустриясын жакшыртуу туризмдин өнүгүүсүнө оң таасирин тийгизүүдө. Бул тууралуу Алмаз Кайырбеков Sputnik Кыргызстан радиосуна маек куруп жатып билдирди.
Анын айтымында, стандарттарды иштеп чыгуу үчүн Стандартташтыруу жана метрология борбору, Адал индустриясын өнүктүрүү мамлекеттик борбору менен биргеликте техникалык комитет түзүлдү.
"Адал индустриясын өнүктүрүү боюнча министрлер кабинетинин иш-чаралардын планы бекитилген. Анда туризм боюнча дагы багыттар каралаган. Дүйнөлүк Global Muslim Travel уюму Кыргызстанды 25-орунга койду. Соңку жылдарда Перс булуңунан туристтер көп келе баштады. Алар өлкөнүн жаратылышына кызыгып келүүдө. Демек, ошолорго тийиштүү тамагы, мейманканасы ж.б. боюнча шарттар түзүлүшү керек. Адал талаптары улуттук жана эл аралык стандарттарга ылайыкташтырылууда", — деди Кайырбеков.
Ошондой эле ал адал индустриясы боюнча тийиштүү мыйзам иштелип чыгып, каралып жатканын кошумчалады.