БИШКЕК, 20-фев. — Sputnik. Россиялык ортопед Михаил Игнатов Sputnik радиосуна спорт залга барууга мүмкүнчүлүгү, убактысы жоктор үчүн кеңеш берди.
Дарыгер кыймыл ден соолукту сактоодо башкы мааниге ээ экендигин, машыгуу залына бара албай жатам деп көнүгүүлөрдү жасабай коюу туура эместигин белгилеген.
"Үйдө деле машыгып, дене мүчөнү жакшы сактоого болот. Адам аз кыймылдаса эле толуп кетет, мындан тышкары, булчуң, сөөктөр ооруй баштайт, түрдүү илдеттер пайда болот. Үйдө деле булчуңга, кан айланууга, сөөктөргө пайдалуу көнүгүүлөрдү жасаганга болот. Интернеттен ыңгайлуу көнүгүүлөрдү көчүрүп алууга шарттар бар. Спорттук реквизиттерди: гантель, гиря, гимнастикалык топ жана башкаларды алып келүү да машыгууга жакшы шарт түзөт. Үйдө жарым саат машыгуу жетиштүү. Эртең менен машыгабы же кечиндеби, көп деле айырмасы жок, башкысы, күн сайын көнүгүүлөрдү аткаруу зарыл. Такыр эле убакыт табылбай жатса аптасына эки-үч жолу машыгуу да өзүнүн натыйжасын берет", — дейт дарыгер.
Мындан тышкары, ал кеңседе отуруп иштегендерди мүмкүн болушунча кыймылдап турууга чакырган.
"Эгер адам жумушуна байланыштуу эртеден-кечке отурууга туура келсе, саатына бир жолу ордунан туруп, бир аз болсо да ары бери басып, дене бойду жазып алганы жакшы. Түшкү тамактануудан соң сыртка чыгып басып келгенге убакыт бөлүшү керек", — деген Игнатов.