Быйыл Бишкекте жайгашкан 107 мектепке адамды жүзүнөн тааныган камера орнотулат. Ал чөнтөк ууруларды, милицияда каттоодо турган адамдарды дароо аныктап берет. Бул тууралуу Тилек Түкөбаев Sputnik Кыргызстан радиосуна маек куруп жатып билдирди.
Анын айтымында, шаар ичиндеги видеокамералардын ишин көзөмөлдөгөн Бишкек милициясынын алкагында Ыкчам чара көрүү жана мониторинг борбору түзүлүп жатат.
"Бүгүнкү күндө мектептеги коопсуздукту камсыздоо иши да приоритеттүү багыт катары каралып жатат. Ушул жылы Бишкекте жайгашкан 107 мектепке адамды жүзүнөн тааныган камера орнотулат. Ал аркылуу окуу жайга ким кирип, ким чыгып жатканы көрүнүп турат. Ошол эле учурда чөнтөк ууруларды, милицияда каттоодо турган адамдарды дароо аныктап берет. Бишкек мэриясынын Билим берүү башкы башкармалыгы менен бирге иштешип жатабыз. Мындан тышкары, шаар ичиндеги адамды жүзүнөн тааныган камералардын, "Коопсуз шаар" долбоорунун видеокамераларынын жана Кырдаалдык борбордун 60 камерасынын ишине көзөмөл салуу үчүн Бишкек милициясынын алкагында Ыкчам чара көрүү жана мониторинг борбору түзүлүүдө. Бул издөөдө жүргөн, дайынсыз жоголгон адамдарды аныктоого мүмкүндүк берет", — деди Түкөбаев.
Ошондой эле адис коомдук жайларда жана кылмыштуулук көп болгон жерлерге адамды жүзүнөн тааныган камераларды орнотуу иштери улантыларын кошумчалады.