Чүй облусунун Сокулук районундагы Маловодное айылындагы борбордо учурда ар кыл курактагы 25 бала камкордукка алынган. Алар жашоонун түрдүү сыноолорунан улам ата-энесинен, жакындарынан алыс тарбияланып келет. Боорукер Иса Өмүракунов менен Таалайкүл Арзыматова канаттууга кактырбай, тумшуктууга чокутпай кичинекейлерди өз уул-кыздарындай өстүрүүдө.
52 жаштагы Иса Өмүракунов буга чейин оор кырдаалга кабылган 200дөн ашык баланы уядан учурганын айтат.
"Биз 13 жылдан бери иштеп 200дөн ашык баланы уядан учурдук. Азыр 25тей бала бар. Ишмердүүлүгүбүздө көптөгөн балдарга кол сундук. Биз балдардын ата-энелери менен да иштейбиз. Кичинекейлер биздин камкордугубузда болгон маалда ата-энеси жөнүндө бир да жаман сөз айтпайбыз. Бул жакта ата-энесинин ордун толуктап, толук үй-бүлөдө өскөндөй кылып тарбиялайбыз. Бара-бара балдар бизди жакшы көрүп, аябай жакын болуп калышат. Кийин жубайлар келип балабызды алып кетебиз дей турган болсо, акырындык менен өзүбүздөн алыстатып беребиз. Ошол эле маалда алар менен байланышты үзүп салбай көзөмөлдөп, кабар алып турабыз. Мисалы, жакында эле беш кызды апасына бердик. Кудай буюрса, энеси иштеп, баары ынтымактуу жашап жатышат", — деди Өмүракунов.
Аталган кризистик борбордун башкалардан айырмачылыгы ара жолдо калган балдардын жакындары менен тыгыз иштешип, аларга да кол сунат.
Таалайкүл Арзыматованын айтымында, эне менен баланы ажыратпоого абдан аракет жасашат.
"Биз оор абалда келген балдар жана алардын энеси менен иштейбиз. Эне менен бала ажырабай бирге болушуна аракет кылабыз. Кабыл алып жатканда ачыкпыз, алып кетебиз десе беребиз. Анан ата-энеси менен чогуу болушу үчүн кол кабыш кылабыз. Кичинекейлердин апасына жумуш таап бергенге, чогуу жашаганга шарт түзөбүз. Алар жумуштан сырткары, дем алыш күндөрү келип балдары менен чогуу болушат", — деди Арзыматова.
Мээримдүү жубайлардын беш баласы бар. Улуусу 30 жашта болсо, кичүүсү алтыда. Алар да ата-энесинин ишине кол кабыш кылып, ар тараптан колдоп турушат.
Тема боюнча: