БИШКЕК, 16-фев. – Sputnik. Учурда аскер кызматкерлери күчкө толуп турган куракта пенсияга чыгууга аргасыз болуп жатат. Бул тууралуу коргоо министри Бактыбек Бекболотов президент тарабынан артка кайтарылган мыйзам долбоорун кайра талкуулоо учурунда айтты.
Эске салсак, "КР жарандарынын жалпыга бирдей аскердик милдети, аскердик жана альтернативалык кызматтар жөнүндө" мыйзамга өзгөртүүлөрдү киргизүү тууралуу" мыйзам сунушталып, парламент аны үч окуудан өткөргөн.
"Анда кызмат өтөөнү капитандарга 43төн 45ке, майорлорго 48ден 50гө, подполковниктерге 48ден 53кө, полковниктерге 53төн 55ке чейин жогорулатуу сунушталган. Бул чара аскер кызматкерлеринин билимин жана тажрыйбасын натыйжалуу пайдалануу үчүн иштелип чыккан. Бирок президенттин каршы пикири менен мыйзам артка кайтарылды, анда мыйзамды колдонуу аскер кызматындагы кадрларды жаңылоого каршы келет деген жүйө келтирилүүдө", — деди ЖК төрагасынын орун басары Нурбек Сыдыгалиев.
Ал эми талкууга катышкан Бактыбек Бекболотов мыйзамды колдоп, учурда аскер кызматкерлери күчкө толуп турган куракта пенсияга чыгууга аргасыз болуп жатканын белгиледи.
Жыйындын катышуучулары бул мыйзам боюнча өз сунуштарын айтып, кеңешменин протоколун президент Садыр Жапаровго жөнөтүүнү чечишти.