БИШКЕК, 16-фев. — Sputnik. Депутат Дастан Бекешев Асанбай кичи району менен "Ата-Түрк" сейил багында курула турган көп кабаттуу үйлөр боюнча иш Ички иштер министрлиги тарабынан тергөөгө чейинки текшерүүгө алынгандыгын билдирди. Ал өзүнүн социалдык тармактагы баракчасына ИИМден келген катты жарыялады.
Эске салсак, Дастан Бекешев Жогорку Кеңештин жыйынында Бишкек шаарынын Асанбай кичи районунда жайгашкан кичи футбол аянтчасынын ордуна 16 кабаттуу үй куруу пландалып жатканын айткан. Ошондой эле "Ата-Түрк" сейил багында мурда Юстиция министрлигине караштуу Жазаларды аткаруу кызматына таандык болгон жер тилкесине көп кабаттуу үй куруу пландалып жатканын кошумчалаган. Депутат курулуш иштеринин мыйзамдуулугун текшерип берүүнү суранган.
Катта Ички иштер министрлиги Дастан Бекешевге төмөнкүлөрдү билдирген:
Аталган кайрылуу 15-февралдан тарта Октябрь РИИБи тарабынан катталып, тергөөгө чейинки иштер башталган;
Текшерүү учурунда Асанбай кичи районунун №41/1 үйүнүн жанындагы кичи футбол аянтчасы алып салынып, анын ордуна “Альфа кыймылсыз мүлк” ЖЧК тарабынан көп кабаттуу үй курулуп жаткандыгы аныкталган;
“Ата-Түрк” эс алуу жайынын айланасында “БСК Капитал Групп” ЖЧК тарабынан көп кабаттуу үй курулуп жаткандыгы аныкталган;
“Ата-Түрк” сейил багындагы мурда Юстиция министрлигине караштуу Жазаларды аткаруу кызматына таандык болгон жер тилкесине көп кабаттуу үй куруу боюнча тергөөгө чейинки текшерүү иши башталды.