БИШКЕК, 14-фев. — Sputnik. Алмазбек Атамбаев Испанияга барып дарылана турганын журналисттерге билдирди.
Ал абакта өткөргөн 3,5 жылда ден соолугу кыйла начарлаганын билдирди.
"Ден соолугум боюнча айтсам, чет жерге чыгып дарыланып келишим керек. Мага бир эмес, бир нече операция жасаш керек. Канчалык эрте болсо ошончо жакшы. Ден соолугумду тез арада чыңдашым керек. Өткөн жылы 47 колониядан кар жаап жатканда ич кийимчен сүйрөп чыгышкан. Ошондо белимди жабыркатып алгам. Эми түрмө ден соолук бербейт да", — деди Атамбаев.
Ал дарылануу үчүн Испанияга бара турганын да айтты.
"Испаниянын премьер-министри өзү чакырган эле. Ошондой эле учурунда Социалдык жана социал-демократиялык партиялардын башкы катчысы болуп турган Луис Айала абдан чоң иш жасады. Ал мени түрмөгө да келип көрүп кеткен. Абдан ыраазымын. Мындан улам Испанияда дарыланууга милдеттүүмүн деп эсептейм", — деди Атамбаев.
Эске салсак, бүгүн, 14-февралда, Жогорку Сот адвокат Замир Жоошев менен Сергей Слесаревдин жаңы ачылган жагдайларга байланыштуу Алмазбек Атамбаевдин кылмыш ишин кайра кароо боюнча өтүнүчүн канааттандырды. Чечим даттанууга жатпайт.
Ага ылайык, Алмазбек Атамбаевге кримтөбөл Азиз Батукаевдин абактан мыйзамсыз бошотулушуна байланыштуу чыгарылган чечим жокко чыгарылып, иш кайрадан кароо үчүн Биринчи май райондук сотуна жиберилди.
Атамбаев Молдовановкадагы абакта ушул иш боюнча кармалып турган. Чечим жокко чыгарылганына байланыштуу мурдагы президент эркиндикке чыкты.
Учурда эмне болуп жатканын Sputnik агенттигинин тексттик трансляциясынан окуңуз.