БИШКЕК, 13-фев. — Sputnik. Кыргызстандык куткаруучулар Түркияда уранды алдында калган дагы бир кишини тирүү алып чыгышты. Бул туурасында Өзгөчө кырдаалдар министрлиги билдирди.
Ал кыйрап калган 12 кабаттуу үйдүн эң астыңкы кабатынан табылган. Куткаруу иштери алты саатка созулуп, Россия жана Беларустан барган адистер менен биргеликте жүргүзүлгөн. Жабырлануучу эркек киши жер титирөөдөн кийин дээрлик бир жума же 160 саат уранды алдында жатканы белгиленди.
6-февраль күнү Түркияга Кыргызстандан 67 кишиден турган куткаруучу топ жөнөтүлгөн. Алар ушуну менен төртүнчү адамды куткарууда. ӨКМдин кызматкерлери буга чейин кош бойлуу келинди, 16 жаштагы өспүрүмдү жана бир жеткинчекти аман алып чыккан болчу.
ӨКМ кечээ дагы экинчи этап менен 80 куткаруучу, 3 дарыгер жана 78 боз үй жөнөтүлгөнүн кабарлады.
Учурда издөө иштери 10 провинцияда жүрүп жатат. Жергиликтүү адистерден сырткары чет мамлекеттерден келген 7 716 куткаруучу издөө, куткаруу иштерин жасап жатканы кабарланды. Соңку маалымат боюнча, зилзаланын кесепетинен Түркияда набыт болгондор 29 миңден ашты, Сирияда 8,5 миңге жетти.
Эскерте кетсек, 6-февраль күнү эртең менен Түркиянын түштүк-чыгышында магнитудасы 7,7ге жеткен жер титирөө болгон. Андан кийин да улам кайталанып жатты. Эрдогандын айтымында, бул 1939-жылдан берки эң катуу зилзала болду.