Өмүрүнүн 60 жылдан ашыгын чыгармачылыкка арнаган дирижер азыр дагы жаштар менен теңтайлашып иштеп келет. Маэстро 45 жылга чукул убакыттан бери Карамолдо Орозов атындагы академиялык эл аспаптар оркестринде дирижер болуп иштеп келет. Сардарбек Жумалиев эмгек жолунда "Бульварым", "Бишкегим", "Таң сыры", "Сары-Челек", "Сен менин жазылбаган ырларымсың", "Жаңы жылды тосолу", "Махабат мекени", "Кетпейм сага жолукмайынча" өңдүү 200гө жакын обон жаратып, анын 60ка жакынын оркестрге салган.
II жана III даражадагы Манас орденинин кавалери чыгармачылыктагы басып өткөн жолуна, кесиптештерине ыраазы.
"Филармониянын жетекчилери да жаштарга акыл-наасатыңызды, кеп-кеңешиңизди айтып, чыгармаларыңызды элге тартуулап иштей бериңиз деп жатышат. Бир чети азыр бул жактагылардын эң улуусу мен болуп калыптырмын. Иштеп тургандын өзү ден соолукка жакшы. Бул жерге келгенде кичине жоопкерчилик болгондуктан өзүмдү тың сезип калам. Кээде музыка эмес, башка багыт менен кетсем аны алып кете алат белем деп ойлоп калам. Мен деле искусство жагы менен кеткениме ыраазымын. Эл эмгегимди баалап бир топ сыйлыктарды алдым, мамлекет батир берип, чыгармачылыгыма шарт түзүп берди. Ырларым эл оозунан түшпөй аткарылып жүрөт. Мага ошонун баары чоң дем-күч", — деди Жумалиев.
Кыргыз эл артисти негизги жумушунан сырткары, Бүбүсара Бейшеналиева атындагы Кыргыз мамлекеттик маданият жана искусство университетинде эмгектенип, жаш дирижерлорду тарбиялап келет. Шайдоот дирижер 82 жашта, баскан-турганы тың, күндө иш ордунда.
Тема боюнча: