Адамды жүзүнөн тааныган камералар кылмыштуулуктун алдын алууга шарт түзөт. Бул тууралуу Алмаз Батырбаев Sputnik Кыргызстан радиосуна маек куруп жатып билдирди.
Анын айтымында, учурда Бишкек шаарында адамды жүзүнөн тааныган камералар орнотулууда.
"Адамды жүзүнөн таануучу камераларды орнотуу үчүн тийиштүү мыйзамдарга өзгөртүүлөр киргизилип, даярдыктар көрүлдү. Адамды жүзүнөн тааныган камералар эл көп топтолгон жерлерге, коомдук жайларга коюлат. Бул кылмыштуулукту алдын алууга мүмкүнчүлүк түзүп, аны изин суутпай ачууга шарт түзөт. Мисалы, 2022-жылдын ноябрынан тарта 170тен ашык жаран камера аркылуу аныкталды. Анын ичинен 30га чукулу дайынсыз жоголгондор болсо, калгандары издөөдө жүргөндөр. Белгилей кетүүчү жагдай, аталган камералар соттун чечими менен издөөгө жарыялангандарды жана жоголду деп базага киргизилгендерди гана аныктай алат", — деди Батырбаев.
Ошондой эле ал "Коопсуз өлкө" долбоорунун алкагында бул долбоорду республика боюнча жайылтуу зарылдыгы бар экенин кошумчалады.