БИШКЕК, 10-фев. — Sputnik. Батыш Сириядагы жер титирөөнү саясатташтырып салды. Гумандуулук жөнүндө сөз жок. Мындай пикирин Сириянын президенти Башар Асад билдирди.
РИА Новости жазганына караганда, Сириянын президенти жума күнү Алепподогу ооруканага жана куткаруу иштери жүрүп жаткан урандыларга барган.
"Албетте, Батыш абалды саясатташтырып жатат. Ал эми гумандуулук мурдагыдай эле жасалган жок", — деп Асад сириялык телеканалга билдирген.
Анын айтымында, жер титирөөдөн кийин Сирияда оор абал жаралды.
"Сириядагы абал өтө начар. Бирок бул өлкөнүн жетишкендиктери анын мүмкүнчүлүктөрүнөн ашып өттү. Биз кыйраган аймактарды калыбына келтирүү жана жабыркагандарга жардам берүү үчүн болгон күч-аракетибизди жумшайбыз", — деди президент.
Бүгүн Россия жер титирөөнүн кесепеттерине байланыштуу Батышты Сирияга салынган санкцияларды тез арада алып салууга чакырды.
Россиянын Тышкы иштер министрлигинин расмий өкүлү Мария Захарованын айтымында, Батыш жер титирөөдөн жабыркаган адамдарга жардам берүү маселесин саясатташтырып жатат.
"Азыркы тапта Сирияга каршы мыйзамсыз салынган санкциялар күчүндө турат. Бул нерсе жер титирөөнүн кесепеттерин жоюуга жана сириялыктарга башка мамлекеттер менен өкмөттүк эмес уюмдардын жардам берүүсүнө тоскоолдуктарды жаратууда", — деди Захарова.
Ал ошондой эле Сириядагы трагедиянын масштабын эске алганда мындай мамиле адамдыкка жатпай турганын белгиледи.
6-февраль күнү эртең менен Түркиянын түштүк-чыгышында магнитудасы 7,7ге жеткен жер титирөө болгон. Эрдогандын айтымында, бул 1939-жылдан берки эң катуу зилзала болду. Анын кесепетинен каза болгондордун саны акыркы маалыматтар боюнча 18 миңге, ал эми жабыркагандардын саны 72 миңге жетти.
Өлкөдө жети күндүк улуттук аза күтүү жарыяланган. Жабыркаган ондогон провинцияга үч айга өзгөчө абал режими киргизилген.
Түркиядагы зилзаланын эпкини Сирияга да тийди. Сириянын Саламаттык сактоо министрлигинин бейшемби күнгө берген маалыматы боюнча, 1347 миң киши каза таап, 2,2 миңден ашык адам жаракат алды.