БИШКЕК, 8-фев. — Sputnik. Акыркы жарым жылдан бери Кыргызстандын түндүгүнө газдын 90 пайызы Россиядан келип жатат. Бул тууралуу "Газпром Кыргызстан" ишканасынын экономика жана финансы боюнча башкы директорунун орун басары Арзымат Алдаяров билдирди.
Ал Sputnik Кыргызстан агенттигинин пресс-борборунда өткөн "Борбор Азиядагы энергетикалык кризис: абалдан кантип чыкса болот?" аттуу брифингге катышты.
"Газпром Кыргызстан" ишканасынын экономика жана финансы боюнча башкы директорунун орун басары Арзымат Алдаяров
Алдаяровдун айтымында, Кыргызстанды гана эмес, жалпы Борбор Азияны газ менен камсыздоо жеңил болгон жок. Адатта экспортчу болуп келген коңшу өлкөлөрдө да соңку бир жарым жылда абал катуу өзгөрдү.
"Спикерлердин бири Өзбекстан биз үчүн негизги жеткирүүчү экенин айтты. Мен анын сөзүн оңдоп коёюн. Жарым жылдан ашык убактан бери республиканын түндүгүнө газ Россиядан Казакстан аркылуу жеткирилип жатат", — деди Алдаяров.
Анын божомолунда, Казакстан менен Өзбекстанда газ өндүрүүнүн төмөндөп кетиши тарифтик саясатка байланыштуу. Көгүлтүр от элге арзан берилет. Мисалы, Өзбекстанда автомашиналардын 90 пайызы газ менен жүрөт. Электр энергияны өндүрүүнүн дээрлик 90 пайызы көгүлтүр от менен жасалат. Бирок газды өндүрүүгө тийиштүү каражат бөлүнгөн эмес.
"Бул кыштагыдай катуу суук рыноктогу аймактык кайра бөлүштүрүү жүрүп жатканын көрсөттү. Казакстан жана Өзбекстан сыяктуу экспортчулар эми кандайдыр бир деңгээлде импортко кызыга баштады", — деди Алдаяров.
Анын ою боюнча газ союзу — бул факт жүзүндө кандайдыр бир макулдашуу. Январь айынын башында "Газпром" аркылуу Казакстан менен Россиянын ортосунда жол картасы кабыл алынган. Эки жумадан кийин ушундай эле документке "Газпром" менен Өзбекстан кол койгон. Анда Россиядан Казакстан менен Өзбекстанга газ жеткирүү макулдашылган.
"Бул нерсе бизге кыйыр таасир этип, газ жеткирүү жагынан дагы да стабилдүүлүккө жетишибиз мүмкүн", — деп кошумчалады орун басар.