БИШКЕК, 7-фев. — Sputnik. Башкы прокурор менен соттордун атын жамынып 7 800 доллар алган адамдар кармалганын Башкы прокуратура билдирди.
Маалыматта Ф.у.К. аттуу адам Чүй облусунун Сокулук районундагы жерин шектүүлөр алдамчылык жолу менен тартып алууга аракеттенип жатышканын айтып, арызданганы айтылат.
Текшерүү жүргүзүлүп, натыйжада Б.О. жана О.А. аттуу жарандар кармалган. Алар Жогорку сотто каралып бүткөн жер маселеси боюнча жаңы ачылган жагдайларды кайра кароодо көмөк көрсөтүп берүү үчүн жабырлануучулардан 7 600 доллар алышкан. Шектүүлөр "маселе Башкы прокуратуранын жетекчилиги менен сүйлөшүлдү" деп адамдардын ишеничине кирген.
"Аталган факт боюнча Башкы прокуратура тарабынан Кылмыш-жаза кодексинин 209-беренеси ("Алдамчылык") менен кылмыш иши козголгон. Тергөө учурунда Б.О. жана О.А. шектүү катары кармалышып, сот аларды эки айга камакка алуу чечимин чыгарды", — деп айтылат маалыматта.
Ушул тапта тергөө иштери жүрүп жатат. Башкы прокуратура билгендерди прокуратура органдарынын жетекчилеринин атын жамынып иштеген адамдар тууралуу кабарлап коюуга чакырды.