БИШКЕК, 2-фев. — Sputnik. Белгоград мамлекеттик университетинин окумуштуулары аялдарды тукумсуздукка алып келген коркунучтуу эндометриоз илдетинин генетикалык белгилерин изилдешти. Бул тууралуу РИА Новости жазды.
ЖОЖдун окумуштуулары изилдөө ишинде эндометриоздун өрчүү механизмдерин гана эмес, генетикалык технологияларды колдонуу менен аны дарылоо боюнча маалыматтарды да топтошкон.
Эндометриоз – аялдардын репродуктивдүү системасында көп кездешчү, тукумсуздук менен байланышкан оору. Окумуштуулар дүйнө жүзүндө 180 миллион аял эндометриоз менен жабыркай тургандыгын айтышкан.
"Заманбап изилдөөлөр ооруга чалдыккандардын 47 пайызында илдеттин өрчүүсү генетикалык факторлор менен байланыштуу экендигин көрсөттү. Эндометриоздун генетикалык механизмдерин тактоо ооруну алдын алууга жана анын жаңы башталган учурунда дарылоого жардам берет", — дешкен изилдөөчүлөр.
Окумуштуулар оору менен гендеги тогуз түрдүү нуклеиддердин алмашуусунун байланышын аныкташкан. Алардын ичинен экөө (rs11031002 жана rs11031005) эндометриозду пайда кылуучулар экендиги белгилүү болгон.
Жалпысынан 34 ген изилденген. Изилдөө иштерине 1 376 аял катышкан, анын ичинен 395и эндометриоз менен ооругандар. Изилдөөчү топ мындан ары да бул оорунун пайда болуу себебин жана дарылоо жолдорун аныктоону улантышат.