БИШКЕК, 2-фев. — Sputnik. Ирандын Коргонуу министрлигинин Исфахандагы объектисине болгон чабуулга Израиль жоопкер. Бул тууралуу ислам республикасынын БУУдагы туруктуу өкүлү Саид Иравани билдиргенин РИА Новости ISNA агенттигине таянып жазды.
"Бул режимдин (Израиль — ред.) аракети эл аралык мыйзамдарды бузуп жаткандыктан айыпталууда", — деп Ираванинин БУУнун Коопсуздук кеңешнин төрагасынын атына жолдогон катында жазылган.
Анын айтымында, Тегеран "Тель-Авивдин чабуулга тиешеси бар" деген тыянакка алгачкы иликтөөдөн кийин келген.
"БУУнун уставы менен эл аралык укуктун негизинде Иран Ислам Республикасы өзүнүн улуттук коопсуздугун коргоо үчүн бардык коркунучтарга жана Израилдин мыйзамсыз аракеттерине каалаган учурда жооп берүүгө акылуу", — деген дипломат.
Эскерте кетсек, 29-январга караган түнү Ирандын борбордук бөлүгүндө жайгашкан Исфахан шаарында ири жарылуу болгон. Коргоо министрлиги курал-жарак сакталган объектиге квадрокоптерлердин жардамы менен жасалган чабуулдун мизи кайтарылганын кабарлаган. Дрондордун бири жок кылынып, дагы экөө капканга түшүп жарылып кеткен. Ошол эле түнү өлкөнүн түндүк-батышында да жарылуу болуп, андан кийин мотор майын өндүргөн ишканадан өрт чыккан.
Al-Jazeera телеканалы ирандык аткаминерге таянып белгилер окуяга Израилдин тиешеси бар экенин көрсөтүп жатканын билдирген. Бул тууралуу америкалык чиновниктерге шилтеме берип Wall Street Journal гезити да жазган.