БИШКЕК, 30-янв. — Sputnik. Баткен облусунун Кадамжай районунда энесинен таяк жеген наристе бир туугандары менен кошо коопсуз жайга жайгаштырылды. Бул тууралуу Эмгек, социалдык камсыздоо жана миграция министрлигинен билдиришти.
Маалыматта Эмгек министрлиги жогоруда аталган окуяны көзөмөлгө алганы айтылган. Ага ылайык, социалдык тармактарда энеси М.Ш. сабап жаткан наристе кыз 2 жашта экени, мындан тышкары, ал аялдын өспүрүм курактагы дагы эки баласы бар экени аныкталган.
“Аталган факт 2023-жылдын 30-январында Кадамжай райондук мамлекеттик администрациясынын алдындагы Балдар иши боюнча комиссияда каралып, балдарды коопсуз жайга жайгаштыруу боюнча комиссиянын чечими чыкты. Анын негизинде балдар Совет айыл аймагында жайгашкан “Кут кадам” үй-бүлө тибиндеги үйгө жайгаштырылды”, — деп жазылат маалыматта.
Министрлик ошондой эле М.Ш. үч баласына 2022-жылдын июль айынан бери “Үй-бүлөгө көмөк” жөлөк пулун (3 600 сом) алып келерин билдирген.
Эске салсак, бүгүн Кыргызстандагы социалдык тармактарда энеси баласын сабап жаткан видео тарап, көпчүлүктүн нааразычылыгын жаратты.
Бул окуя боюнча Баткен милициясы 27-январда аларга Кадамжай районунун 39 жаштагы А.Б. аттуу тургуну арыз менен кайрылганын маалымдаган. Анда А.Б. видеодо жарандык никеде жашаган Ш.М. аттуу аялы алардын ортодогу кызын сабап салганын билдирген.
Аталган факт боюнча Кылмыш-жаза кодексинин 138-беренеси ("Баланы, алсыз адамды же күнөөлүү адамдан материалдык жактан көз каранды болгон кишини, ошого тете уурдалган же барымтага алынган адам катары кармалган жаранды кыйноо") менен кылмыш иши козголду. Учурда тергөө амалдары жүрүп жатат.