БИШКЕК, 28-янв. — Sputnik. Социалдык тармактарда министрлер кабинетинин төрагасы — президенттин администрациясынын жетекчиси Акылбек Жапаровду негизсиз жана максаттуу каралоо жүрүп жатканы байкалууда. Бул туурасында президенттин маалымат кызматынын жетекчиси Дайырбек Орунбеков социалдык тармактагы баракчасына жазды.
Ал сын-пикирлер эч кандай фактылар менен бекемделбей, куру доомат, көпчүлүк учурда адамдын аброюна, сырткы келбетине чейин асылуу менен коштолуп жатканын чоң өкүнүч менен белгилей тургандыгын айткан.
“Акылбек Жапаровдун мамлекеттик кызматтардын бардык тепкичтерин ырааттуу басып өтүп, такшалган мамлекетчил жетекчи экени белгилүү. Күчтүү кризис-менеджер катары өлкө жетекчилигине, министрлер кабинетине алгылыктуу сунуштарды иштеп чыгып берүү менен анын аркасында мамлекеттин бюджети, ошого жараша бир катар тармактарда эмгек акылары, социалдык төлөмдөр жогорулатылганына салымы бар экени маалым”, — деп жазган Орунбеков.
Маалымат катчы министрлер кабинетинин төрагасы Акылбек Жапаровдун президент Садыр Жапаровдун командасында өзүнө берилген ыйгарым укуктардын чегинде иш алып барып жатканын белгилеген.
“Мамлекеттик кызматтагылар адекваттуу сын-пикирлерди жана сунуштарды кабыл алууга ар дайым даяр. Андыктан, социалдык тармактардын колдонуучуларын инсандын турпатына, жекелигине асылуудан алыс болууга чакырабыз”, — деп постун жыйынтыктаган маалымат катчы.