БИШКЕК, 26-янв. — Sputnik. Талас облусунун Талас районуна өзгөчө кырдаал режими киргизилди. Бул тууралуу ӨКМдин маалымат кызматы кабарлады.
Буга Талас районундагы Көпүрө-Базар айылынан агып өткөн Кара-Кол дарыясына муз тоңуп, жээкке жакын жайгашкан үйлөрдү жана короо-жайларды каптоо коркунучу жаралганы себеп болгон.
© Фото / пресс-служба МЧС КР
Учурда өзгөчө кырдаалды жөнгө салуу үчүн кызматкерлер жана тиешелүү каражаттар тартылган. Ошондой эле "Кызыл ай" коому муз тазалап иштегендерге үч күндүк ысык тамагын уюштурууда.
Буга чейин Жалал-Абад облусунун Майлы-Суу шаарында катуу сууктан улам өзгөчө кырдаал режими киргизилген. Ал жакта суу кампасындагы түтүктөр тоңуп, андан соң отканаларга суу толук келбей жылуулук берүү да үзгүлтүккө учураган. Учурда калыбына келтирүү иштери жүрүүдө.