БИШКЕК, 26-янв. — Sputnik. Жогорку Кеңеште Каржы пирамидасын жарнамалаган таанымал адамдарды жазага тартуу мыйзам долбоору биринчи окуудан өттү.
Демилгечи депутат Шаирбек Ташиев долбоор каржы пирамидаларын уюштурууну жөнгө салууга багытталганын белгиледи. Анын айтымында, 2022-жылы пирамида фактысы боюнча 882 кылмыш иши козголуп, 1052 адам жабырлануучу болуп эсептелет. Жалпы суммасы 273 миллион сом жана 1 миллион 597 миң долларды түзөт.
"Акыркы жылдары миңдеген жараныбыз каржылык чайкоочулук камтыган турак жай кооперативдерине алданып калышууда. Каржы пирамидасы аркылуу шылуундук кылган жарандар өз максатына жетүү үчүн элге таанымал адамдарды колдонуп жарнама кылышат. Алардын постторунан кийин карапайым эл ишенип алып өз мүлкүнөн ажырап калууда. Андыктан каржы пирамидасын түзгөн шылуунду эле эмес, анын ишин жарнамалаган адамдарды дагы жоопко тартуу сунушталууда. Мыйзам күчүнө кирсе таанымал инсандарыбыз да мыйзамсыз иштерге аралашуудан оолак болуп калышабы деп демилгелеп жатабыз", — деди Ташиев.
Эгер мыйзам колдоо тапса, каржы пирамидаларын жарнамалап жеке өзү ири суммада киреше тапкан жаранга 2-2,5 миллион сом айып пул салынат же үч жылдан беш жылга чейин эркинен ажыратылат.