БИШКЕК, 26-янв. — Sputnik. АКШнын президенти Жо Байден теле аркылуу АКШ М1 Abrams үлгүсүндөгү 31 танканы Киевге жөнөтөрүн жарыялады. Бул тууралуу РИА Новости жазды.
Ал аскердик жардам башка өлкөлөрдөн келген жүктөр менен коштолорун белгилеген. Сооттолгон техника 400 миллион долларга бааланары айтылууда.
"Жаз жакындаган сайын украин аскерлери колундагы аймактарды коргоого киришип, каршы чабуулга даярданууда", — деди Байден.
Америкалык лидер ошондой эле Киевге аскердик жардам берүү Россияга коркунуч туудурбасын белгиледи. Анын айтымында, АКШ БУУнун уставын коргоого ниеттенүүдө. Ал эми Украинага жабдуу жеткирүү чечими — "Батыштын биримдигинин дагы бир далили" болду.
Өз кезегинде Мамлекеттик Думанын эл аралык иштер боюнча комитетинин башчысы Леонид Слуцкий америкалык танк батальону Владимир Зеленскийге Крымды басып алууга жардам бере албастыгын билдирди. https://ria.ru/20230125/tanki-1847466578.html
"Америкалык танк батальону Владимир Зеленскийге Крымды басып алууга жана Россиянын атайын операциясынын багытын өзгөртүүгө жардам бербейт. Киев бардык чабуулдарга катаал жооп алат", — деди Слуцкий.
Ал ошондой эле Батыш Киевдин колу менен Россия менен тирешип жаткандыгын кошумчалаган.
Ал эми Роскосмостун мурунку жетекчиси Дмитрий Рогозин февралда Донбасска чалгындоочу жана сокку уруучу төрт Marker роботу жеткирилерин айтты.
"Marker роботу америкалык "Абрамс" танкалары менен Германиянын "Леопарддары" баш болгон украин жабдууларын автоматтык түрдө аныктап, кыйрата алат", — деген Рогозин.
Эске салсак, шаршембиде Германиянын канцлери Олаф Шольц Leopard 2А6 танкаларын Украинага жиберүү чечимин кабыл алганын жарыялаган.
Россия өткөн жылдын 24-февралында Украинага атайын операциясын баштаган. Президент Владимир Путин анын максатын "сегиз жылдан бери киевдик режим тарабынан геноцидге жана мазактоого кабылган элди коргоо" деп атаган. Бирок АКШ менен анын НАТО боюнча союздаштары ошондон бери Киевге 10 миллиарддаган долларлык курал жеткирүүдө. Россия Батыш тараптын Украинаны куралдандыруусу орус-украин сүйлөшүүлөрүнүн ийгиликтүү болушуна өбөлгө боло албашын жана мындан негативдүү жыйынтык чыгышы мүмкүн экендигин, Украинага берилген ар бир курал Россия үчүн мыйзамдуу бута болорун айтып келет.