БИШКЕК, 22-янв. — Sputnik. Энергетика министрлиги эмнеге кечээ, 21-январда, Бишкек шаары менен Чүйдө электр кубаты өчүрүлбөгөнүн түшүндүрдү.
Белгилей кетсек, социалдык тармакта соңку эки күндөн бери айрым жерлерде электр энергиясы өчпөй калганын айтышууда.
Министрлик өчүрүүлөр ар дайым эле график менен дал келбей турганын билдирди.
Маалыматка ылайык, Чүй облусу жана Бишкекте электр энергиясын колдонуу ашыкча болбой жана аз күч келгендиктен өчүрүлгөн жок. Акырындык менен башка региондордо да өчүрүү токтошу мүмкүн.
"Мисалы, график боюнча сиздин көчөдө саат 15:00дөн 17:00гө чейин белгиленсе, бирок ал жакта ашыкча күч келбесе, анда өчпөй да калышы мүмкүн. Бирок керектөө кескин түрдө көбөйсө, мисалы, саат 19:00дө жарык өчүрүлүшү ыктымал. Баары керектөөнүн көлөмүнө байланыштуу. Кечээ аба ырайы салыштырмалуу жылуу болду, ошондуктан азыраак күч келди", — деп билдирди министрлик.
Январдын башында башка жактардай эле Кыргызстанда да суук катуу болгондуктан электр энергиясын колдонгондор кескин түрдө көбөйгөн. Энергетиктер ашыкча күч келүүдөн улам ири авариялар катталбашы үчүн график менен өчүрүү чечимин кабыл алган.