БИШКЕК, 20-янв. — Sputnik. Президент Садыр Жапаров бүгүн, 20-январда, "Ысык-Көл" жана "Каракол" эл аралык аэропортторун модернизациялоо долбоорлору менен таанышты. Бул тууралуу өлкө башчынын маалымат кызматы билдирди.
Садыр Жапаров бүгүн Ысык-Көл облусуна жумушчу сапары менен барган. Эскерте кетсек, президент 31-декабрдагы жаңы жылдык куттуктоосунан кийин элге чыга элек болчу. Ага "Манас эл аралык аэропорту" ачык акционердик коому, Президенттин иш башкармалыгы жана Өзгөчө кырдаалдар министрлиги тарабынан жүргүзүлүп жаткан иштер тууралуу төмөнкүдөй маалыматтар берилген:
"Ысык-Көл" аэропортунда саатына 450 жүргүнчү кабыл ала турган аэровокзал комплексинин жаңы имаратын куруу пландалууда. Азыр анын долбоордук-сметалык документтери иштелип жатат;
аэропорттун аймагын кеңейтүү, кошумча тосмо орнотуу, селден коргоо үчүн жаңы курулмаларды салуу долбоорлору иштелип жатат;
келечекте "Тамчы" эркин экономикалык аймагы түзүлүп, "Каракол" жана "Балыкчы" ЭЭАлары жоюлат;
"Каракол" эл аралык аэропортунун аэровокзал комплексинин жаңы имаратынын курулушу жүрүп, учуу тилкеси узартылып жатат.
"Келечекте аэропорт Embraer жана анын аналогдору сыяктуу жаңы муундагы авиалайнерлерди кабыл ала алат. Бул дагы чет өлкөлөрдөн туристтердин агымын көбөйтөт", — деп жазылат маалыматта.
Ошондой эле "Ысык-Көл", "Каракол", "Нарын", "Ош", "Жалал-Абад" аэропортторун реконструкциялоо пландалууда. Ал эми Талас облусунда аэропорт ишке киргизилип, "Баткен" жана "Казарман" аэропортторунун аэродромдорун оңдоо-калыбына келтирүү иштери жүрүп жатат.