БИШКЕК, 19-янв. — Sputnik. "Альфа Телеком" ишканасы (MEGA соода маркасы, мурунку MegaCom) эч кандай жол менен жеке колго же чет өлкөлүк компанияларга өтпөйт. Бул тууралуу президенттин маалымат катчысы Эрбол Султанбаев билдирди.
Анын айтымында, учурда уюлдук операторго байланыштуу кырдаал боюнча Жогорку Кеңеште 2023-2025-жылдарга мамлекеттик мүлктү менчиктештирүү программасы талкууланууда. Менчиктештириле турган объектилердин тизмесине MEGA да киргизилип, мындан улам ал толук баалоодон өткөн.
"Бул эмнени билдирет? Менчиктештириле турган объектилердин тизмесине киргизилгенден кийин башкаруучу өзгөрүп, же Улуттук банк, же Мамлекеттик өнүктүрүү банкы кожоюн болот деп болжолдонууда. Тийиштүү чечим министрлер кабинети тарабынан кабыл алынат. Башкача айтканда, компания өлкөнүн бюджетин толтурууга салым кошууну улантуу менен мамлекеттин карамагында калат", — деген Султанбаев.
Ал "компания эч кандай жол менен жеке колго же чет өлкөлүк компанияларга өтпөй тургандыгын" белгилеген.
"Анын үстүнө башкаруучунун алмашуусу калкка көрсөтүлүүчү кызматтардын сапатынын жакшырышына, MEGA мамлекеттик компаниясын андан ары активдүү өнүктүрүүгө тез алып келет деп күтүлүүдө", — деп кошумчалаган президенттин маалымат катчысы.
Эске салсак, "Альфа Телеком" ишканасынын 100 пайыз акциясы мамлекетке тиешелүү. Бийликтин көп жылдар бою компанияны сатуу аракетинен майнап чыкпай, анын баштапкы баасы бир нече жолу (19 миллиард сом жана 13,5 миллиард сом) өзгөргөн.
Өткөн жылдын аягында Кыргызстанда "Альфа Телеком" ишканасын сатуу маселеси кайрадан көтөрүлгөн.