БИШКЕК, 19-янв. — Sputnik. "Газпром Кыргызстан" компаниясы Бишкектин жана Чүй облусунун жашоочуларына газ берүүнү үзгүлтүккө учуратпай турганын билдирди.
"Социалдык тармактарда компания Бишкек шаарынын жана Чүй облусунун жашоочуларына жаратылыш газын токтотууну пландап жатат деп тарап жаткан маалымат чындыкка дал келбейт", — деп айтылат маалыматта.
Ошондой эле Казакстан аркылуу Кыргызстандын түндүгүн көгүлтүр от менен камсыз кылган магистралдык газ өткөргүчтөгү басымдын азайгандыгы айтылган. Ага байланыштуу "Газпром" компаниясы калкты жана социалдык объектилерди (бала бакчалар, мектептер, жылуулук менен камсыз кылган мамлекеттик уюмдар) газ менен камсыз кылуу максатында коммерциялык ишканаларга — мончо, ресторан, кафе жана өндүрүштө газ колдонгон ишканаларга жаратылыш газын берүүнү убактылуу токтотууга мажбур болгондугун кошумчалады.