БИШКЕК, 18-янв. — Sputnik. Евробиримдик кызматташуу боюнча ЕБ — НАТО биргелешкен декларациясына кол коюп, биротоло АКШга моюн сунуп берди. Бул тууралуу РФ тышкы иштер министри Сергей Лавров 2022-жылдын жыйынтыгын чыгарган маалымат жыйында билдирди.
Буга чейин НАТО баш катчысы Йенс Столтенберг, Еврокеңештин башчысы Шарль Мишель жана Еврокомиссиянын жетекчиси Урсула фон дер Ляйен альянстын Брюсселдеги штабында кызматташуу боюнча үчүнчү декларацияга кол коюшкан. Аталган келишимди кабыл алуу бир катар себептерден улам жылдырылып келген. Документте тараптар НАТОну "жамааттык коргонуу жана союздаштардын коопсуздугунун негизи" катары таануу ниетин билдиришти.
"Менимче, Евробиримдик толугу менен америкалык диктатка баш ийип берди, муну талкуулап да кереги жок. 10-январда биргелешкен декларацияга кол коюп, моюн сунганын тастыктады. Келишимде НАТО менен ЕБ алтын миллиарддын кызыкчылыгы үчүн саясий да, экономикалык да, аскердик да каражаттарды колдонууну максат кылары ачык эле айтылат. "НАТО менен Евробиримдиктин бир миллиард жаранынын кызыкчылыгы үчүн" деп так кесе көрсөтүлгөн", — деди Лавров.
РФ ТИМи буга чейин аталган декларация Евробиримдиктин коргонуу саясатын альянс үчүн экинчи планга чыгарып, бул өз кезегинде ЕБдин өз алдынча болуу ниетин биротоло жок кыларын белгилеген.