БИШКЕК, 17-янв. — Sputnik. Бишкекте төрт балалуу үй-бүлө киоскиде жашаган. Бул тууралуу мэриянын маалымат кызматынан кабарлады.
Үй-бүлө (күйөөсү-аялы жана кичинекей төрт баласы) Белорусская көчөсү менен Соң-Көл чолок көчөсү кесилишкен жердеги павильондо күн кечирип келген. Ал жерде балдарды тарбиялоого жана багууга шарт жоктугун айтышты.
11-январда жашы жете электер боюнча инспекторлор менен мэриянын үй-бүлөнү жана балдарды колдоо боюнча бөлүмдүн кызматкерлери балдарды алып кеткенге аракет кылып, бирок атасы аларга бербей койгон. Аны Октябрь райондук милициясына алып келишкен.
Ал эми балдардын энесине түшүндүрүү иштери жүргүзүлгөн. Аялга балдар менен аялдар туруучу кризистик борбордо жашап туруу сунушталган. Ал макул болгон.