БИШКЕК, 16-янв. — Sputnik. Ички иштер министринин орун басары Нурбек Абдиев Ош шаарында уюшкан кылмыштуу топтун мүчөсүнүн өлтүрүлүшүнүн негизги себебин атады.
Анын айтымында, эки касташкан топтун ортосундагы буга чейинки чыр-чатактар тууралуу маалымат такталууда. Абдиев уюшкан кылмыштуу топтун каза болгон мүчөсү баңгизатын мыйзамсыз саткандыгы үчүн тергөөдөн өтүп жаткандыгын билдирди. Милиция андан товар сатып алып, эми ири партия сатып жаткан учурунда кармоого аракет жасап жаткан болчу.
"Жаңжалдын себептерин изилдеп жатабыз. Эң негизгиси — Оштогу таасир этүү чөйрөлөрүн бөлүштүрүү. Ошондой эле экинчи топ дагы баңгизатты мыйзамсыз жүгүртүүгө шектелип жатат", — деди ал.
Абдиев ошондой эле кылмыштын уюштуруучусу катары кармалган Кадырбек Досонов (Женго) криминалдык авторитет Камчы Көлбаевдин тобунан экенин кошумчалады.
Буга чейин социалдык тармактарга топтошкон кишилердин урушуп жаткан видеосу тараган. Анда бир адамды экинчиси арматурага окшош буюм менен аёосуз сабап, тепкилеп жаткандыгын көрүүгө болот. Ош шаардык ички иштер башкармалыгы кылмыштын жагдайын тактап, жаңжалда арматура менен сабалган эмес, бычактан жаракат алган экинчи адам каза болгондугун билдирген. Маркум ал видеого түшпөй калган.
Кылмышка катыштыгы бар делген Женгодон тышкары издөөдө жүргөн төрт шектүү кармалган. Башкаларды издөө иштери уланууда.