Ормон хан күчтүү күүчү, кыйын комузчу болгон экен. Жоортулга чыгарда, жоого кирип баратканда же машыгуу өткөрөрдө дөңсөөгө отуруп алып, жоокерлерине күү чертип берчү дешет. Бул тууралуу Келдибек Ниязов Sputnik Кыргызстан радиосуна маек куруп жатып билдирди.
Анын айтымында, "Көкөй кести" күүсүнүн автору Ормон хан болгону учурда иликтенип, далилденди.
"Көкөй кести" күүсүнүн чыныгы автору Ормон хан, ал башка бирөөгө үйрөтүп, андан Мураталы Күрөңкөев үйрөнгөн экен. (Мутаке, Мураталы Күрөңкөев — ред.) Ормон хандын күүсү деп эле чертип жүргөн дешет. Кийин ал Карамолдо Орозовго өткөрүп бериптир. Ал киши дагы күүнүн таржымалын, авторун айтып чертет. Бирок кийин жазма булактарга түшкөндө Ормон хан унутулуп эле элдик күү же Карамолдо Орозовдуку деп жазыла баштаган. Элге да ушинтип тарап кеткен. Муну ЖКнын төрт жолку чакырылышынын депутаты, жазуучу Каныбек Иманалиев иликтеп, Ормон хан кимге үйрөткөнүн, ал кантип Мураталы Күрөңкөевге үйрөтүп кеткенин таптым деп жүрөт. Бул тууралуу Түгөлбай Сыдыкбековдун айтканын да кулагым чалган жайы бар",— деди Ниязов.
Ал тарыхтагы айрым айтылбай калган фактыларды ачыктап, жаштарга айта жүрүү зарылдыгы бар экенин кошумчалады.