Жогорку соттун төрагасы менен орун басарларынын 2021-жылга карата декларациясы

БИШКЕК, 9-янв. — Sputnik. Мамлекеттик кызматкерлердин 2021-жылга карата декларациясы жарыяланды. Белгилей кетсек, бул убакыттын ичинде алардын көбү кызматтарын алмаштырышкан, бирок биз алардын азыркы ээлеген кызмат орундарын карап көрдүк. Бул материалда кеп Жогорку соттун азыркы жетекчилиги тууралуу болот.

Замирбек Базарбеков 2021-жылдын жай айына чейин президенттик аппараттын соттук реформа жана мыйзамдуулук бөлүмүн жетектеп, андан кийин Жогорку соттун судьясы болгон. Ал өткөн жылдын башынан тарта Жогорку сотко төрагалык кылып келет.

Мурдагы жылдын декларациясына ылайык, ал бир жылда 2 миллион 800 миң сомдон ашык киреше тапкан. Өзүндө бир гектар жер аянты жана Kia Rio үлгүсүндөгү автоунаасы бар. Ал эми "жакын туугандар" графасында эч нерсе көрсөтүлгөн эмес.

Айбек Давлетов (2022-жылга чейин Жогорку соттун судьясы болгон, учурда Жогорку соттун төрагасынын орун басары). Ал 1 миллион 100 миң сомдон ашык киреше тапкан, гаражы жана Land Prado үлгүсүндөгү унаасы бар. Анын жакын туугандары дээрлик 323 миң сом киреше таап, 103,5 чарчы метр аянтты ээлеген батирге, ошондой эле "Фуд компани" ЖЧКсынын үлүшүнө ээ экендиги айтылат.

Нурлан Мусаев 2022-жылдын аягына чейин Жогорку сотто судья болуп, андан соң төраганын орун басары кызматына көтөрүлгөн. Декларация боюнча, ал 967 миң сом киреше тапкан, жалпы аянты 30 гектар болгон айыл чарба жерине ээлик кылат. Анын жакын туугандарынын ушундай эле аянттагы айыл чарба жерлери, Toyota Highlander үлгүсүндөгү автоунаасы жана 2 миллион сом кирешеси көрсөтүлгөн.

Нүргүл Бакирова 2021-жылы төраганын орун басары, андан кийин Жогорку соттун төрагасы, учурда Жогорку соттун жетекчисинин орун басары болуп иштейт. Декларация боюнча, ал жарым миллион сом киреше тапкан, кыймылсыз жана кыймылдуу мүлкү көрсөтүлгөн эмес. Жакын туугандары мурдагы жылы 2,7 миллион сом киреше тапкан жана 80 миң сом сарпташкан. Аларда 2 миллион 650 миң сомго бааланган мал жана канаттуулары бар экендиги көрсөтүлгөн.