БИШКЕК, 9-янв. — Sputnik. Кытай Кыргызстан жарандарынын кирип-чыгуусу үчүн дээрлик үч жылдан кийин чек арасын ачты. Бул туурасында УКМКнын Чек ара кызматы кабарлады.
Маалыматка ылайык, Кытайга барууну каалаган кыргызстандыктар Ош облусунун Алай районунда жайгашкан "Эркеч-Там" көзөмөл-өткөрүү пункту аркылуу жалпы жарандык паспорту менен өтө алышат. Ошол эле учурда виза алуу талабы да бар. Ал эми "Торугарт" бекети өзгөчө алгоритмдин негизинде жүк ташуу үчүн гана иштейт.
Мындан сырткары, төмөнкүдөй шарттары бар:
Кытайдын элчилиги же консулдугунан саламаттыгы боюнча атайын QR-код алуу талабы жокко чыгарылды;
чек арадан өткөнгө чейинки 48 сааттын аралыгында тапшырган CОVID-19га каршы тесттин терс жыйынтыгы;
авиакаттам менен учкан жарандар учакка отургандан баштап бет кабын чечпеши зарыл;
Кытайга баргандан кийин ПЦР-тест тапшыруу жана жаматтык обсервацияда болуу талаптары алып салынды;
бардык жүргүнчүлөр ден соолугу тууралуу бажы декларациясын толтуруусу абзел;
эгер декларацияга абалы анча эмес экенин жазып же дене табы көтөрүлгөн болсо, ошол жерден антигенге тест тапшырат;
кандайдыр бир оору аныкталса, абалына карап үй шартындагы карантин же медициналык мекемеде дарылануу сунушталат.
Кыргызстандын Чек ара кызматы кыргыз-кытай чек арасынан өтүү жол-жобосу боюнча маселе жаралса 0 312 88 16 18 жана 0 312 54 38 36 номерлерине кайрылууну эскертти.
Белгилей кетсек, 2020-жылдын башында CОVID-19 илдетине байланыштуу Кыргызстан менен Кытайдын чек арасы жөө адамдардын өтүүсү үчүн жабылган. Былтыртан баштап учак аркылуу каттай башташкан.