БИШКЕК, 7-янв. — Sputnik. Мексиканын Синалоа штатында Овидио Гусман Лопес аттуу баңгизат сатуучуну кармоо операциясынын жүрүшүндө укук коргоо органдарынын он кызматкери өлтүрүлүп, 19 кылмышкер жок кылынды. Бул тууралуу РИА Новости Мексиканын коргоо министри Луис Сандовалга шилтеме берүү менен жазды.
“Овидиону куткаруу жана жоокерлерге кол салуу максатында бир нече кылмыштуу топ бириккен. Тилекке каршы, жети жоокер набыт болуп, тогузу жаракат алды. Кылмышкерлер пулемёт колдонгондуктан, аскерлер аларды учактан туруп аткылоого аргасыз болгон”, — деп айтылат маалыматта.
2019-жылы наркобарон Овидио Гузман Лопестин камалышы Кулиакан шаарында көчө салгылашууларына алып келген. Анда жергиликтүү картелдин согушкерлери федералдык бийликти атайын операцияны токтотуп, Овидиону бошотууга мажбурлап калышкан. Бул жолу ал дароо борборго алып келинип, катуу кайтарылган Альтиплано түрмөсүнө жеткирилген. Жергиликтүү күчтөрдү колдоо үчүн 3500дөн ашык аскер кызматчысы, анын ичинде атайын күчтөр жана десантчылар, ошондой эле миңге жакын улуттук гвардиянын жоокери Синалоага жөнөтүлгөн.
Бийликтегилердин айтымында, бейшембиде картелдин мүчөлөрү 250гө жакын унааны уурдап, өрттөп жиберишкен. Алар кеминде 18 көчөнү тосуп, үч аэропорттун ишин токтотушту. Бандиттер Синалоа аэродромунда аскердик жана граждандык самолётторго ок атышып, Мексиканын аскер-аба күчтөрүнүн эки борту жабыркап, авариялык конуу жасашкан.
Коргоо министрлиги Овидио Гусман Лопес “Тынч океан картелинин” жаштар канатын жетектеп, өлкөнүн түндүк-батышындагы төрт штатта кылмыш иштерин жүргүзүп келерин билдирди. Овидио — АКШда өмүр бою эркинен ажыратылган Хоакин Гусман Лоэранын уулу.
Гусман Лопес АКШ экстрадициялоону талап кыла турган кылмышкерлердин болжолдуу тизмесине кирет. Ал кокаин, метамфетамин жана марихуана ташыган деп айыпталууда.