БИШКЕК, 5-янв. — Sputnik. Шанхай кызматташтык уюмуна (ШКУ) мүчө-мамлекеттер Украина менен байланышкан кризисти жөнгө салуу үчүн ыңгайлуу шарттарды түзгөнгө даяр. Бул тууралуу уюмдун катчысы Чжан Мин РИА Новости агенттигине курган маегинде айткан.
Чжан Мин Украинадагы жаңжал башталгандан тартып ШКУ ага дайыма көңүл буруп, эки өлкө бири-бири менен тил табышуусуна, аймактагы жалпы абал жөнгө салынып, жаңжал ынтымактуу, саясий, дипломатиялык жол менен чечилишине колдоо көрсөтүп келгенин белгиледи.
"ШКУга мүчө-мамлекеттердин көбү тиешелүү өлкөлөр арасындагы байланыштын жакшырышына ыңгайлуу шарт түзүүгө, көйгөйдү жөнгө салып, чечүүгө даяр экендигине күбөбүз. Украинадагы гуманитардык каатчылыкты жоюуга бардык аракеттер жасалып жатат", — деген уюмдун катчысы.
Ал дүйнөдө болуп жаткан өзгөрүүлөр жана каатчылыктарга карабай Шанхай кызматташтык уюмундагы өлкөлөр жогорку деңгээлдеги кызматташтыкта экендигин белгилеген.
"Өткөн 2022-жыл абдан оор, татаал жылдардан болду. Ошол эле учурда бул жыл кыйынчылыктарды мүмкүнчүлүктөргө, өнүгүүнүн жаңы жетишкендиктерине жетүүгө айландыруу жылы болгонун айта кетүү керек. Жыл ичинде дүйнөдө геосаясий абал татаалдашты, абдан катуу өзгөрдү, эл аралык саясат, экономика, коопсуздук жаатында каатчылыктар болду", — деген Чжан Мин.
Чжан Мин мындай кырдаалга карабастан ШКУга кирген мамлекеттер өз ара мамилесин бузбай кызматташтыкты жогорку деңгээлде сактап, кыйынчылыктарды туура баа берип, алака улантылып жаткандыгы кубанарлык көрүнүш экендигин кошумчалаган.
Ошондой эле ал уюмга кирген өлкөлөрдүн баары бир пикирде экендигин, кооптуулук канчалык күч болсо уюмдун мүчөлөрү ошончолук ынтымакташып, аймактардагы туруктуу өнүгүү үчүн "чоң үй-бүлө" ичиндеги биримдикти сактап калышы керектигин айтты.