БИШКЕК, 31-дек. — Sputnik. Украинада атайын операция уланып жаткан маалда Россия менен Кытайдын барган сайын мамилесинин бекемделиши АКШнын тынчын алууда. Бул тууралуу Американын Мамлекеттик департаментинин расмий өкүлү Владимир Путин менен Си Цзиньпиндин сүйлөшүүсүнө комментарий берип жатып билдиргенин РИА Новости жазды.
Эскерте кетсек, жума күнү Владимир Путин менен Си Цзиньпин видео байланыш аркылуу баарлашкан. Кытай лидери өлкө Россия жана башка "гегемония менен күч саясатына каршы чыккан прогрессивдүү тараптардын баары менен" иштешүүгө даяр экенин билдирди. Мындан тышкары, бир тараптуу саясатка каршы туруп, эки өлкөнүн коопсуздугун коргоого ниетин белгилеген. Си Цзиньпиндин айтымында, Кытай менен Россия энергетика тармагындагы кызматташуусун улантышы керек. Ошону менен бирге эки өлкө жетекчилигинин саясаты Кытай менен Россиянын ортосундагы мамиленин баалуулугун арттырганына токтолгон.
"Москва Украинага чабуулун улантып жаткан маалда анын Кытай менен жакындашуусу биздин тынчыбызды алып келет. Пекин нейтралдуу позицияда экенин айткан, бирок, ошол эле учурда, Россия менен болгон алакасын өрчүтүүнү токтоткон жок", — деди америкалык ведомствонун өкүлү.
Анын айтымында, АКШ менен Европа КЭРге Россияга көрсөткөн колдоонун жана санкцияны кыйгап өтүү аракетинин кесепети тууралуу эскертишкен. "Биз Пекиндин ар бир кадамына дыкат көз салуудабыз", — деди дипломат.
Россия 24-февралда баштаган Украинадагы атайын операциясын улантып келет. Максаты "сегиз жылдан бери Киев режиминин кордугуна, кыргынына дуушар болгон" Донбасстын элин коргоо зарылдыгы деп белгиленген. РФ президентинин айтымында, бул үчүн "Украинада денацификациялоо жана демилитаризация жүргүзүп", аскер кылмышкерлеринин баарын сот жообуна тартуу керек.
Күзүндө Россиянын курамына ДЭК, ЛЭК, Запорожье жана Херсон облустары кирген.