Майрам күнү эртеден кечке ачка жүрүп, кечинде тоё тамактанган туура эмес. Бул учурда адам өзүн өтө ачка сезип, тамакты көп жеп, бир аздан кийин күптү болуп калат. Адам күнүнө беш жолу тамактануу режимин бузбашы керек. Бул тууралуу Марина Дүйшөнкулова Sputnik Кыргызстан радиосунун эфиринде маек куруп жатып билдирди.
Анын айтымында, мешке, бууга жана сууга бышкан тамак-ашка басым жасоо зарыл. Себеби куурулган тамакта витаминдер күйүп, химиялык затка айланып, холестерин пайда болот.
"Изилдөөлөргө таянсак адам күнүнө 8-10 сааттын ичинде (мисалы, эртең менен 08:00дө туруп тамактанса кечки 18:00гө чейин) тамактанышы керек. Андан ашык тамактануу сунушталбайт. Мындай режимди сактаса тамак сиӊип, зат алмашуу процесси жакшы жүрөт. Адам тамактанганда 20 мүнөттөн соӊ тойгонун сезет. Жеген тамакты сиӊирүү үчүн дары колдонуп, газдалган суусундуктарды ичип биз өз организмибизди тескерисинче кыйнайбыз. Жаӊы жылдык дасторконго ар түрдүү азыктардан даярдалган тамак-аш коюлганы жакшы. Адамдын санына жараша ошол кечте желип кеткендей порцияда жасалганы оӊ. Ал эми эӊ популярдуу болгон оливье салатын чара-чара кылып жасаган кооптуу. Ал билинбей бузулуп, ууландырган учурлар жыл сайын катталат. Эӊ жакшысы, ингредиенттерди өз-өзүнчө контейнерге салып, муздаткычта сактап жей тургандын алдында гана майонез менен аралаштыруу. Андан тышкары, суунун дагы балансын сактоо зарыл. Күнүнө адамдын 1 килограмм салмагына 30 грамм суу туура келет. Кээде адам суусап жатканда ачка болуу сезими пайда болуп тамак жеп алышат. Бул салмак кошууга алып келет", — деди Дүйшөнкулова.
Ал тамактын алдында 15-20 мүнөт мурун жылуу суу ичип, жеӊил тамактардан баштап, анан оор тамактарга өтүү керектигин кошумчалады.