БИШКЕК, 30-дек. — Sputnik. Россиянын президенти Владимир Путин диверсиялык жамааттарды түзүп, аны каржылап жана жайылткандарды өмүр бою эркинен ажыратууну караган мыйзамга кол койду. Документ укуктук маалыматтын расмий интернет-порталында жарыяланды.
Россиянын Кылмыш-жаза кодекси үч жаңы берене менен толукталган.
Биринчи "Диверсиялык ишке көмөк көрсөтүү" беренесинде 300 миңден 700 миң рублга чейин айып салуу менен 8 жылдан 15 жылга чейин эркинен ажыратуу жазасы каралган. Эгерде бул кылмыш кызмат абалынан пайдаланып жасалса, анда күнөөлүүлөр 10 жылдан 20 жылга чейин эркинен ажыратылып, 500 миңден миллион рублга чейин айып пул төлөйт. Диверсияны уюштуруу жана аны каржылагандар 15 жылдан 20 жылга чейин жаза өтөөгө каралган же өмүр бою эркинен ажыратылышы мүмкүн.
Экинчи беренеде диверсия кылуу боюнча даярдыктан өткөндөр 15 жылдан 20 жылга чейин жазаланаары айтылган.
Үчүнчү беренеге ылайык, диверсиялык жамааттардын катышуучулары 500 миң рублга чейин айып пул төлөп, беш жылдан он жылга чейин эркинен ажыратылат. Ал эми аны уюштургандар 15 жылга чейин же өмүр бою абакка кесилет.
Мындан сырткары, Путин диверсиялык иштерди каржылоого катышкан адамдардын эсептерин жабуу мүмкүнчүлүгүн караган мыйзамга кол койду.
Ошондой эле ок-дарыларды мыйзамсыз даярдоо ыкмалары тууралуу маалыматка тыюу салган жана мындай маалыматтарды камтыган интернет-ресурстарды жабууну караган мыйзамга кол койду.