БИШКЕК, 29-дек. — Sputnik. Бишкекте россиялык жаранды тротуардан койдуруп кеткен айдоочу кармалып, кечирим сурады. Бул тууралуу Кайгуул милициянын маалымат кызматы билдирди.
"Мен кечээки жоругум үчүн кечирим сурайм. Ким жаңылышпайт... Экинчи мындай кайталанбайт", — деп айткан айдоочу видеодо.
Жабырланган киши россиялык Евгений Романов экени белгилүү болду. Ал өзү окуя кечээ болгондугун, рулдагы киши УКМКда иштейм дегенин айтты.
Кырсыкка күбө болгондор BMW X5 автоунаасын 35-40 жаштын тегерегиндеги кызуу адам айдап жүргөнүн айтышты.
Ал эми жабырлануучунун билдиргенине караганда, койдуруп алгандан кийин рулдагы киши аны автоунаасына салып алып, ооруканага эмес, УКМКга алып жөнөгөн. Жолдон опузалап, муунтканга аракет кылган. Романов УКМКнын дарбазасынын жанынан окуяны көргөндөр, жолдо өтүп бара жаткандар анын айдоочунун колунан бошонуп ооруканага кетишине көмөктөшкөнүн билдирди.
Жабырлануучу буту сынганын, ал эми мойнунда муунтулгандан издер калганын айтты.
Ал эми УКМК окуя тууралуу расмий билдирүү таратып, чет элдик жаранды койдуруп кеткен адам атайын комитетте иштебей турганын билдирди.