Кыргызстанда "Имараттардын энергетикалык натыйжалуулугу жөнүндө" мыйзам 2011-жылдан бери иштеп келет. Ал эми 2013-жылы иштелип чыккан Кыргызстандын курулуш нормаларына ылайык, салына турчу долбоорлор экспертизадан өтүп, корутунду чыгарылып, талапка жооп берсе курулат. Бул тууралуу Максат Амираев Sputnik Кыргызстан радиосунун эфиринде маек куруп жатып билдирди.
Анын айтымында, азыр улуттук курулуш нормаларын иштеп чыгуу жана кайра карап чыгуу маселелери өзгөчө актуалдуу болууда.
"Учурда энергияны үнөмдөөчү элементтерди киргизүү менен "Көп батирлүү турак жайларды" куруунун улуттук нормасы иштелип чыгууда. Азыркы жана жаңы турак жай имараттары үчүн энергияны үнөмдөөнүн параметрлерин жакшыртууга басым жасалууда. Климаттык технологиялар борбору жана Архитектура, курулуш жана турак жай-коммуналдык чарба мамлекеттик агенттиги менен биргелешип "От казандарды орнотуу" жана "Жылуулук, желдетүү жана абаны тазалоо" курулуш нормалары жакшыртылып жана бекитилди. Аткарылган иштер имараттардын энергетикалык натыйжалуулугун жогорулатуунун эсебинен өлкөнүн энергияны керектөөсүн болжол менен 20 пайызга кыскартууга жардам берет. Имараттардын энергетикалык майнаптуулугу абдан маанилүү. Бул экономикага, экологияга, ошол эле шаар ичиндеги ыш маселесине да түздөн-түз таасир этүүчү фактор. Мамкурулуш агенттиги энергияны үнөмдөө саясатынын алгачкы этаптарын ишке ашырууну ийгиликтүү аткарды. Бүгүнкү күндө энергетикалык аудиторлорго 27 сертификат берилди. Бул багыттагы иштер дагы да улантылат", — деди Амираев.
Ал өлкөдөгү имараттардын жылуулукту чыгарбай, өзүнө кандай кармап тура алары текшерилип, сертификациядан өтүп жатканын кошумчалады.